saja saja ke rakha jinko aainon ki tarah

sajā sajā ke rakhā jin ko ā.inoñ kī tarah

gire nazar se to bikhre haiñ kirchiyoñ kī tarah

bujhe bujhe haiñ purānī mohabbatoñ ke gulāb

sabā guzar ga.ī be-mehr sā'atoñ kī tarah

bikhar gaye to sameTā na zindagī ne hameñ

nikhar gaye to damakte haiñ motiyoñ kī tarah

nahīñ kisī se shikāyat ki bār-hā ham ne

ḳhud apne ghar ko jalāyā hai mash'aloñ kī tarah

yahī mizāj hai apnā kisī kā dil na dukhe

judā.iyoñ ko bhī chāhā hai qurbatoñ kī tarah

tirī talab kā dil-āvez hādsa ham ne

bhulā diyā hai ka.ī aur hādsoñ kī tarah

jo dil kā nuur nazar kā surūr the vo log

hamīñ se pesh ab aa.e haiñ dushmanoñ kī tarah

falak-nashīno zamīñ kī taraf kabhī dekho

haiñ pastiyāñ bhī muqaddas bulandiyoñ kī tarah

bas ik uchaTtī nazar us taraf bhī ai shah-e-husn

jo rāstoñ meñ khaḌe haiñ musāfiroñ kī tarah

koī qarīb to hai jis ke faiz se 'mohsin'

ḳhayāl zehn meñ bajte haiñ ghuñghruoñ kī tarah

saja saja ke rakha jin ko aainon ki tarah

gire nazar se to bikhre hain kirchiyon ki tarah

bujhe bujhe hain purani mohabbaton ke gulab

saba guzar gai be-mehr sa'aton ki tarah

bikhar gaye to sameTa na zindagi ne hamein

nikhar gaye to damakte hain motiyon ki tarah

nahin kisi se shikayat ki bar-ha hum ne

KHud apne ghar ko jalaya hai mash'alon ki tarah

yahi mizaj hai apna kisi ka dil na dukhe

judaiyon ko bhi chaha hai qurbaton ki tarah

teri talab ka dil-awez hadsa hum ne

bhula diya hai kai aur hadson ki tarah

jo dil ka nur nazar ka surur the wo log

hamin se pesh ab aae hain dushmanon ki tarah

falak-nashino zamin ki taraf kabhi dekho

hain pastiyan bhi muqaddas bulandiyon ki tarah

bas ek uchaTti nazar us taraf bhi ai shah-e-husn

jo raston mein khaDe hain musafiron ki tarah

koi qarib to hai jis ke faiz se 'mohsin'

KHayal zehn mein bajte hain ghunghruon ki tarah