dil mein kisi majbur ke jazbaat bandhe the

dil meñ kisī majbūr ke jazbāt bañdhe the

tar aañkh thī hoñToñ pe savālāt bañdhe the

ghar meñ thā tire dam se ujālā hī ujālā

chehre ke tire nuur se zulmāt bañdhe the

duniyā kī nigāhoñ kā 'ajab jaal paḌā thā

karte bhī to kis tarh mulāqāt bañdhe the

kuchh soch na paa.e na qalam haath meñ aayā

zanjīr meñ ashkoñ ke ḳhayālāt bañdhe the

ehsās thā tahzīb kā uThte bhī to kaise

sho’rā kī vo mahfil thī ki kal raat bañdhe the

is haal meñ niiñd aañkh meñ aatī bhī to kaise

yādoñ kī tirī Dor se kal raat bañdhe the

vo train ke Dabbe meñ 'azīzoñ se ghirā thā

bhīgī huī āñkhoñ meñ savālāt bañdhe the

kyā qadr vahāñ hotī 'zafar' dīda-e-tar kī

resham meñ jahāñ saikḌoñ sauġhāt bañdhe the

dil mein kisi majbur ke jazbaat bandhe the

tar aankh thi honTon pe sawalat bandhe the

ghar mein tha tere dam se ujala hi ujala

chehre ke tere nur se zulmat bandhe the

duniya ki nigahon ka 'ajab jal paDa tha

karte bhi to kis tarh mulaqat bandhe the

kuchh soch na pae na qalam hath mein aaya

zanjir mein ashkon ke KHayalat bandhe the

ehsas tha tahzib ka uThte bhi to kaise

sho’ra ki wo mahfil thi ki kal raat bandhe the

is haal mein nind aankh mein aati bhi to kaise

yaadon ki teri Dor se kal raat bandhe the

wo train ke Dabbe mein 'azizon se ghira tha

bhigi hui aankhon mein sawalat bandhe the

kya qadr wahan hoti 'zafar' dida-e-tar ki

resham mein jahan saikDon saughat bandhe the