dil ki taKHrib ko tamir samajhne wale

dil kī taḳhrīb ko tā'mīr samajhne vaale

haiñ vahī 'ishq kī tāsīr samajhne vaale

vo mire 'azm se vāqif hī kahāñ haiñ āḳhir

merī pāzeb ko zanjīr samajhne vaale

merī tanhā.ī ke sāthī haiñ ye saare jugnū

haiñ yahī nāla-e-shab-gīr samajhne vaale

un se jazbāt samajhne kī tavaqqo' kab hai

jo faqat ḳhat ko haiñ tahrīr samajhne vaale

'ārzī sab hai yahāñ kyā unheñ mā'lūm nahīñ

mere ġham ko mirī taqdīr samajhne vaale

'ishq ke khel meñ vo log purāne hoñge

haiñ jo āñkhoñ ke sabhī tiir samajhne vaale

mujh ko ġhairoñ se gila koī nahīñ hai 'rūbī'

mere apne hī nahīñ piir samajhne vaale

dil ki taKHrib ko ta'mir samajhne wale

hain wahi 'ishq ki tasir samajhne wale

wo mere 'azm se waqif hi kahan hain aaKHir

meri pazeb ko zanjir samajhne wale

meri tanhai ke sathi hain ye sare jugnu

hain yahi nala-e-shab-gir samajhne wale

un se jazbaat samajhne ki tawaqqo' kab hai

jo faqat KHat ko hain tahrir samajhne wale

'arzi sab hai yahan kya unhen ma'lum nahin

mere gham ko meri taqdir samajhne wale

'ishq ke khel mein wo log purane honge

hain jo aankhon ke sabhi tir samajhne wale

mujh ko ghairon se gila koi nahin hai 'rubi'

mere apne hi nahin pir samajhne wale