chappa chappa kona kona shahr ka humne chhana hai

chappa chappa konā konā shahr kā ham ne chhānā hai

vaqt ne karvaT badlī ab har moḌ yahāñ an-jānā hai

faanī hai ye maal ye daulat ye duniyā kī jhūTī shaan

yaad rakho jab aa.e qazā to sab kuchh chhoḌ ke jaanā hai

nazreñ ġhair kī chīzoñ par haiñ īmānoñ kī ḳhair nahīñ

farq vo shāyad bhuul ga.e kyā apnā kyā begānā hai

din ke ujle-pan meñ shab kī tārīkī ham bhuul ga.e

shor-sharāba kar ke thak kar raat ko phir so jaanā hai

aaj kitābeñ dekhīñ un kī asl vahāñ mā'lūm huī

lafzoñ ke saudā-gar haiñ kuchh karnā kuchh farmānā hai

'rāzī' kaun ḳhabar rakhtā hai kis ko us kā qurb milā

kyā hai qalandar kyā suufī kyā zāhid kyā dīvāna hai

chappa chappa kona kona shahr ka hum ne chhana hai

waqt ne karwaT badli ab har moD yahan an-jaana hai

fani hai ye mal ye daulat ye duniya ki jhuTi shan

yaad rakho jab aae qaza to sab kuchh chhoD ke jaana hai

nazren ghair ki chizon par hain imanon ki KHair nahin

farq wo shayad bhul gae kya apna kya begana hai

din ke ujle-pan mein shab ki tariki hum bhul gae

shor-sharaba kar ke thak kar raat ko phir so jaana hai

aaj kitaben dekhin un ki asl wahan ma'lum hui

lafzon ke sauda-gar hain kuchh karna kuchh farmana hai

'raazi' kaun KHabar rakhta hai kis ko us ka qurb mila

kya hai qalandar kya sufi kya zahid kya diwana hai