babul dasht mein thi koh par sanobar the

babūl dasht meñ thī koh par sanobar the

ye tere 'adl ke māthe pe kaise zevar the

ilāhī kis ke ishāre se mujh pe TuuT paḌe

vo be-lagām 'anāsir jo mere chākar the

havā chalī to qayāmat ghaTā uThī to balā

ye ḳhaas qism ke ehsāñ tire mujhī par the

girift-e-āb meñ haiñ jin kī mayyatoñ ke hujūm

ye aadmī tire tāj-e-shahī ke gauhar the

ye rizq bāñTte the is bharī ḳhudā.ī meñ

bahut ġharīb magar kitne banda-parvar the

ravāñ-davāñ the mire khet sat.h-e-dariyā par

'ajīb fasl ugī thī 'ajīb manzar the

aTī huī hai jo malbe se us zamīñ pe kabhī

ghane daraḳht the aur gūñjte hue ghar the

maiñ shahr-e-naġhma-o-nai meñ palaT ke jab aayā

karāhtī thiiñ chhateñ aur sīna-zan dar the

sazā milī ye samar-var daraḳht banñe kī

ki 'umr-bhar mirī qismat meñ sirf patthar the

'ajīb shaan se niklā thā dostoñ kā julūs

ki phuul haath meñ aur āstīñ meñ ḳhanjar the

falak kī tarh badaltī hai rang dhartī bhī

sunā hai ab jo haiñ sahrā kabhī samundar the

maiñ jin ko chun ke ab ik āshiyāñ banā.ūñgā

kabhī yahī ḳhas-o-ḳhāshāk mere shahpar the

'nadīm' mausam-e-bārāñ to qatl-e-'ām sā thā

ki dast-e-abr meñ būñdeñ nahīñ thiiñ nashtar the

babul dasht mein thi koh par sanobar the

ye tere 'adl ke mathe pe kaise zewar the

ilahi kis ke ishaare se mujh pe TuT paDe

wo be-lagam 'anasir jo mere chaakar the

hawa chali to qayamat ghaTa uThi to bala

ye KHas qism ke ehsan tere mujhi par the

girift-e-ab mein hain jin ki mayyaton ke hujum

ye aadmi tere taj-e-shahi ke gauhar the

ye rizq banTte the is bhari KHudai mein

bahut gharib magar kitne banda-parwar the

rawan-dawan the mere khet sath-e-dariya par

'ajib fasl ugi thi 'ajib manzar the

aTi hui hai jo malbe se us zamin pe kabhi

ghane daraKHt the aur gunjte hue ghar the

main shahr-e-naghma-o-nai mein palaT ke jab aaya

karahti thin chhaten aur sina-zan dar the

saza mili ye samar-war daraKHt banne ki

ki 'umr-bhar meri qismat mein sirf patthar the

'ajib shan se nikla tha doston ka julus

ki phul hath mein aur aastin mein KHanjar the

falak ki tarh badalti hai rang dharti bhi

suna hai ab jo hain sahra kabhi samundar the

main jin ko chun ke ab ek aashiyan banaunga

kabhi yahi KHas-o-KHashak mere shahpar the

'nadim' mausam-e-baran to qatl-e-'am sa tha

ki dast-e-abr mein bunden nahin thin nashtar the