mujh pe bhi hone lagi wahshat si tari hae hae

mujh pe bhī hone lagī vahshat sī taarī haa.e haa.e

is se pahle shab nahīñ hotī thī bhārī haa.e haa.e

dushman-e-jāñ bhī mujhe ab hausla dene lage

kaun karne lag gayā hai ġham-gusārī haa.e haa.e

dushmanoñ kī saf meñ jab se yaar shāmil ho ga.e

kaun hai jo ab nibhā.e rasm-e-yārī haa.e haa.e

baḳhiya-gar ab terī ye baḳhiya-garī be-sūd hai

dil pe yāroñ ne lagā.ī zarb-kārī haa.e haa.e

'ishq kī rāheñ bahut pur-pech haiñ ye jaan le

'ishq kī taqdīr meñ hotī hai ḳhvārī haa.e haa.e

sāhiloñ par sab safīne ham jalā kar aa ga.e

ab se ho murdoñ kī hī mardum-shumārī haa.e haa.e

āstīñ ke saañp bhī har vaqt mere saath the

pur-ḳhatar ye zindagī ham ne guzārī haa.e haa.e

is jahāñ meñ girgiToñ kī chār-sū bharmār hai

muḳhlisī kā qaht hai 'arqam-buḳhārī’ haa.e haa.e

mujh pe bhi hone lagi wahshat si tari hae hae

is se pahle shab nahin hoti thi bhaari hae hae

dushman-e-jaan bhi mujhe ab hausla dene lage

kaun karne lag gaya hai gham-gusari hae hae

dushmanon ki saf mein jab se yar shamil ho gae

kaun hai jo ab nibhae rasm-e-yari hae hae

baKHiya-gar ab teri ye baKHiya-gari be-sud hai

dil pe yaron ne lagai zarb-kari hae hae

'ishq ki rahen bahut pur-pech hain ye jaan le

'ishq ki taqdir mein hoti hai KHwari hae hae

sahilon par sab safine hum jala kar aa gae

ab se ho murdon ki hi mardum-shumari hae hae

aastin ke sanp bhi har waqt mere sath the

pur-KHatar ye zindagi hum ne guzari hae hae

is jahan mein girgiTon ki chaar-su bharmar hai

muKHlisi ka qaht hai 'arqam-buKHari’ hae hae