meri ghazlon mein jo dukh hai mera zati nahin hota

mirī ġhazloñ meñ jo dukh hai mirā zaatī nahīñ hotā

mohabbat meñ agar maiñ itnā jazbātī nahīñ hotā

tū merī dostī ko de rahā hai aaj jo gaalī

magar ye yaad rakh har aadmī ghātī nahīñ hotā

mohabbat kā ye ankur phūTtā to hai javānī meñ

magar ye aisā paudhā hai jo barsātī nahīñ hotā

safar meñ yuuñ to kahne ko bahut se log milte haiñ

magar har aadmī dukh dard kā sāthī nahīñ hotā

yahāñ dā'vā faqīrī kā bahut se log karte haiñ

magar duniyā meñ har sādhū karāmātī nahīñ hotā

bahut pur-pech hotī haiñ ḳhirad kī manzileñ lekin

junūñ kā rāsta itnā tilismātī nahīñ hotā

agar hālāt kā maarā huā banda na hotā maiñ

'kabīr' apnā taḳhallus hai jo hālātī nahīñ hotā

meri ghazlon mein jo dukh hai mera zati nahin hota

mohabbat mein agar main itna jazbaati nahin hota

tu meri dosti ko de raha hai aaj jo gali

magar ye yaad rakh har aadmi ghati nahin hota

mohabbat ka ye ankur phuTta to hai jawani mein

magar ye aisa paudha hai jo barsati nahin hota

safar mein yun to kahne ko bahut se log milte hain

magar har aadmi dukh dard ka sathi nahin hota

yahan da'wa faqiri ka bahut se log karte hain

magar duniya mein har sadhu karamati nahin hota

bahut pur-pech hoti hain KHirad ki manzilen lekin

junun ka rasta itna tilismati nahin hota

agar haalat ka mara hua banda na hota main

'kabir' apna taKHallus hai jo haalati nahin hota