kisi bhi haal mein ghairat ko ruswa kar nahin sakte

kisī bhī haal meñ ġhairat ko rusvā kar nahīñ sakte

tirī mahfil meñ iz.hār-e-tamannā kar nahīñ sakte

jo taare toḌ laane kā kare dā'vā vo jhūTā hai

jo puurā kar na paa.eñ ham vo vā'da kar nahīñ sakte

ḳhudā apnā jo nāsir ho to mil kar saare dushman bhī

koī phir baal bhī biikā hamārā kar nahīñ sakte

na.ī tahzīb ke 'āshiq jo aa.e haiñ mohabbat meñ

faqat zulfoñ se tum un ko divāna kar nahīñ sakte

agar tūfān meñ kashtī jo aa.ī saath Dūbeñge

bhañvar meñ chhoḌ kar tum ko kināra kar nahīñ sakte

baḌī tā'dād par apnī sitāro tum na itrāo

binā mahtāb ke hargiz ujālā kar nahīñ sakte

qazā sar par khaḌī thī dekh kar us ne kahā phir bhī

chale aao mirī ḳhātir bahāna kar nahīñ sakte

'bilāl' un ko masīhā-e-dil-e-bīmār kyuuñ kahiye

hamāre dard-o-ġham kā jo mudāvā kar nahīñ sakte

kisi bhi haal mein ghairat ko ruswa kar nahin sakte

teri mahfil mein izhaar-e-tamanna kar nahin sakte

jo tare toD lane ka kare da'wa wo jhuTa hai

jo pura kar na paen hum wo wa'da kar nahin sakte

KHuda apna jo nasir ho to mil kar sare dushman bhi

koi phir baal bhi bika hamara kar nahin sakte

nai tahzib ke 'ashiq jo aae hain mohabbat mein

faqat zulfon se tum un ko diwana kar nahin sakte

agar tufan mein kashti jo aai sath Dubenge

bhanwar mein chhoD kar tum ko kinara kar nahin sakte

baDi ta'dad par apni sitaro tum na itrao

bina mahtab ke hargiz ujala kar nahin sakte

qaza sar par khaDi thi dekh kar us ne kaha phir bhi

chale aao meri KHatir bahana kar nahin sakte

'bilal' un ko masiha-e-dil-e-bimar kyun kahiye

hamare dard-o-gham ka jo mudawa kar nahin sakte