hadse kab kahan nahin hote

hādse kab kahāñ nahīñ hote

kuchh nihāñ kuchh 'ayāñ nahīñ hote

ham shikāyat-parast haiñ varna

shukr ke din kahāñ nahīñ hote

jo kareñ dushmanoñ ko sharminda

dost aise kahāñ nahīñ hote

ye nigāhoñ ne keh diyā varna

kuchh matālib bayāñ nahīñ hote

raat bhar rāstoñ pe rahte haiñ

jugnuoñ ke makāñ nahīñ hote

kāġhazī phuul laakh rangīñ hoñ

shāmil-e-gulsitāñ nahīñ hote

aazmā lo yahāñ mohabbat ko

'arsh par imtihāñ nahīñ hote

ruuTh kar kis taraf ko jāoge

dil se achchhe makāñ nahīñ hote

jo badal jaate haiñ zamāne se

vo imām-e-zamāñ nahīñ hote

rāsta kaun sā hai jis pe 'taqī'

rahzanoñ ke makāñ nahīñ hote

hadse kab kahan nahin hote

kuchh nihan kuchh 'ayan nahin hote

hum shikayat-parast hain warna

shukr ke din kahan nahin hote

jo karen dushmanon ko sharminda

dost aise kahan nahin hote

ye nigahon ne keh diya warna

kuchh matalib bayan nahin hote

raat bhar raston pe rahte hain

jugnuon ke makan nahin hote

kaghazi phul lakh rangin hon

shamil-e-gulsitan nahin hote

aazma lo yahan mohabbat ko

'arsh par imtihan nahin hote

ruTh kar kis taraf ko jaoge

dil se achchhe makan nahin hote

jo badal jate hain zamane se

wo imam-e-zaman nahin hote

rasta kaun sa hai jis pe 'taqi'

rahzanon ke makan nahin hote