dushman-e-jaan meri jaan hue jate hain
dushman-e-jān mirī jaan hue jaate haiñ
kyā yahī 'ishq ke imkān hue jaate haiñ
koī itnā bhī bhalā kaise badal saktā hai
aap ko dekh ke hairān hue jaate haiñ
ab mohabbat kī kitābeñ nahīñ paḌhtā koī
ab varaq us ke bhī halkān hue jaate haiñ
bas abhī maiñ ne sajā.e the jo ḳhvāb āñkhoñ meñ
dekhte dekhte vīrān hue jaate haiñ
hijr ne tere sikhāyā hai sulagne kā hunar
ham tire 'ishq meñ lobān hue jaate haiñ
dil pe ash'ār utarte haiñ tirī furqat meñ
aur ham sāhib-e-dīvān hue jaate haiñ
'ain mushkil to isī baat meñ hai ab 'rūbī'
marhale 'ishq ke āsān hue jaate haiñ
dushman-e-jaan meri jaan hue jate hain
kya yahi 'ishq ke imkan hue jate hain
koi itna bhi bhala kaise badal sakta hai
aap ko dekh ke hairan hue jate hain
ab mohabbat ki kitaben nahin paDhta koi
ab waraq us ke bhi halkan hue jate hain
bas abhi main ne sajae the jo KHwab aankhon mein
dekhte dekhte viran hue jate hain
hijr ne tere sikhaya hai sulagne ka hunar
hum tere 'ishq mein loban hue jate hain
dil pe ash'ar utarte hain teri furqat mein
aur hum sahib-e-diwan hue jate hain
'ain mushkil to isi baat mein hai ab 'rubi'
marhale 'ishq ke aasan hue jate hain
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
