har bar nae tiron ki bauchhaar kare hai

har baar na.e tīroñ kī bauchhār kare hai

ye kaam thā dushman kā magar yaar kare hai

de saktā huuñ maiñ us ko javāb un kī zabāñ meñ

majbūr magar mujh ko ye dastār kare hai

ham ne to du'ā māñgī hai dushman ke liye bhī

ik tū hai ki apnoñ pe hī yalġhār kare hai

jo shaḳhs mire naam se mansūb huā thā

vo aaj mirī raah ko pur-ḳhār kare hai

pahle to banātī hai makāñ ḳhud hī hukūmat

phir us pe sitam ye hai ki mismār kare hai

bedār na kar de kahīñ ye niiñd se sab ko

pāzeb tire paaoñ kī jhankār kare hai

dekhā na karo shoḳh nigāhoñ se ḳhudā-rā

ye tīr-e-nazar merā jigar paar kare hai

ham 'mīr' ke shaidā.ī haiñ 'ġhālib' ke haiñ paikar

duniyā ko yahī baat to bezār kare hai

har bar nae tiron ki bauchhaar kare hai

ye kaam tha dushman ka magar yar kare hai

de sakta hun main us ko jawab un ki zaban mein

majbur magar mujh ko ye dastar kare hai

hum ne to du'a mangi hai dushman ke liye bhi

ek tu hai ki apnon pe hi yalghaar kare hai

jo shaKHs mere nam se mansub hua tha

wo aaj meri rah ko pur-KHar kare hai

pahle to banati hai makan KHud hi hukumat

phir us pe sitam ye hai ki mismar kare hai

bedar na kar de kahin ye nind se sab ko

pazeb tere paon ki jhankar kare hai

dekha na karo shoKH nigahon se KHuda-ra

ye tir-e-nazar mera jigar par kare hai

hum 'mir' ke shaidai hain 'ghaalib' ke hain paikar

duniya ko yahi baat to bezar kare hai