umr-e-barq-o-sharar hai duniya

'umr-e-barq-o-sharār hai duniyā

kitnī be-e'tibār hai duniyā

daaġh se koī dil nahīñ ḳhālī

kyā koī lāla-zār hai duniyā

har jagah jang har jagah hai nizā’

'arsa-e-kār-zār hai duniyā

āne-jāne pe saañs ke hai madār

saḳht nā-pā.edār hai duniyā

ek jhoñke meñ hai idhar se udhar

chaar din kī bahār hai duniyā

bad-tar is ko samajh ḳhizāñ se 'amīr'

dekhne ko bahār hai duniyā

'umr-e-barq-o-sharar hai duniya

kitni be-e'tibar hai duniya

dagh se koi dil nahin KHali

kya koi lala-zar hai duniya

har jagah jang har jagah hai niza’

'arsa-e-kar-zar hai duniya

aane-jaane pe sans ke hai madar

saKHt na-paedar hai duniya

ek jhonke mein hai idhar se udhar

chaar din ki bahaar hai duniya

bad-tar is ko samajh KHizan se 'amir'

dekhne ko bahaar hai duniya