dukh ka ehsas na mara jae

dukh kā ehsās na maarā jaa.e

aaj jī khol ke haarā jaa.e

in makānoñ meñ koī bhuut bhī hai

raat ke vaqt pukārā jaa.e

sochne baiTheñ to is duniyā meñ

ek lamha na guzārā jaa.e

DhūñDtā huuñ maiñ zamīñ achchhī sī

ye badan jis meñ utārā jaa.e

saath chaltā huā saaya apnā

ek patthar use maarā jaa.e

ham yagāna to nahīñ haiñ 'alvī'

naav jaa.e ki kinārā jaa.e

dukh ka ehsas na mara jae

aaj ji khol ke haara jae

in makanon mein koi bhut bhi hai

raat ke waqt pukara jae

sochne baiThen to is duniya mein

ek lamha na guzara jae

DhunDta hun main zamin achchhi si

ye badan jis mein utara jae

sath chalta hua saya apna

ek patthar use mara jae

hum yagana to nahin hain 'alwi'

naw jae ki kinara jae