koi mera bhi hota jo kabhi koi dua deta

koī merā bhī hotā jo kabhī koī du'ā detā

yā phir ehsān ye kartā mujhe jām-e-qazā detā

kahāñ DhūñDūñ maiñ vo rahbar dikhā kar jo mujhe rasta

miTā detā mire ġham ko mujhe rab se milā detā

ḳhudā se lau lagātī to 'atā hotā mujhe sab kuchh

paḌā thā vāsta bande se banda mujh ko kyā detā

koī aisā to hotā jis se kartī dil kī bāteñ maiñ

koī aisā to hotā jo mujhe apnī navā detā

sabaq sab ne paḌhāyā hai mujhe to bevafā.ī kā

koī pās-e-vafā rakhtā koī dars-e-vafā detā

chhupātā hai mire 'isyāñ ḳhudā kā zarf bhī dekho

bashar koī ḳhudā hotā yaqīnan vo sazā detā

yaqīnan be-ḳhabar thā mujh se 'tamsīla' vagarna vo

agar pahchāntā mujh ko to kyā aise gañvā detā

koi mera bhi hota jo kabhi koi du'a deta

ya phir ehsan ye karta mujhe jam-e-qaza deta

kahan DhunDun main wo rahbar dikha kar jo mujhe rasta

miTa deta mere gham ko mujhe rab se mila deta

KHuda se lau lagati to 'ata hota mujhe sab kuchh

paDa tha wasta bande se banda mujh ko kya deta

koi aisa to hota jis se karti dil ki baaten main

koi aisa to hota jo mujhe apni nawa deta

sabaq sab ne paDhaya hai mujhe to bewafai ka

koi pas-e-wafa rakhta koi dars-e-wafa deta

chhupata hai mere 'isyan KHuda ka zarf bhi dekho

bashar koi KHuda hota yaqinan wo saza deta

yaqinan be-KHabar tha mujh se 'tamsila' wagarna wo

agar pahchanta mujh ko to kya aise ganwa deta