KHushbu riwayaton ki ho fikr-e-suKHan ke sath

ḳhushbū rivāyatoñ kī ho fikr-e-suḳhan ke saath

rakhiye ġhazal sajā ke na.e pairahan ke saath

narmī hai mom kī sī basī lafz lafz meñ

ḳhush-bū hai sham'-e-fikr kī dil meñ jalan ke saath

ham kāġhazī nuqūsh ke ḳhānoñ meñ bañT ga.e

mahdūd kyuuñ hoñ sarhadeñ dil kī vatan ke saath

pahchāniye bhī kaise ki merī sadī ke log

chehre badalte rahte haiñ ab pairahan ke saath

rasman sahī salām to karne lage haiñ vo

bal de ke abrūoñ pe ruḳh-e-pur-shikan ke saath

thaktī nahīñ kabhī ye umīdeñ du'āoñ se

sajde meñ so gayā huuñ bhale hī thakan ke saath

murjhā rahe haiñ phuul ḳhayāloñ ke dam-ba-dam

chashm-e-hunar kī dhuup meñ jalte badan ke saath

simTī hai kā.ināt mire lā-shu'ūr meñ

baḌhtī haiñ is kī vus'ateñ 'rāzī' zaman ke saath

KHushbu riwayaton ki ho fikr-e-suKHan ke sath

rakhiye ghazal saja ke nae pairahan ke sath

narmi hai mom ki si basi lafz lafz mein

KHush-bu hai sham'-e-fikr ki dil mein jalan ke sath

hum kaghazi nuqush ke KHanon mein banT gae

mahdud kyun hon sarhaden dil ki watan ke sath

pahchaniye bhi kaise ki meri sadi ke log

chehre badalte rahte hain ab pairahan ke sath

rasman sahi salam to karne lage hain wo

bal de ke abruon pe ruKH-e-pur-shikan ke sath

thakti nahin kabhi ye umiden du'aon se

sajde mein so gaya hun bhale hi thakan ke sath

murjha rahe hain phul KHayalon ke dam-ba-dam

chashm-e-hunar ki dhup mein jalte badan ke sath

simTi hai kainat mere la-shu'ur mein

baDhti hain is ki wus'aten 'raazi' zaman ke sath