yaron ne apne apne gharon ko basa liya

yāroñ ne apne apne gharoñ ko basā liyā

ik tum ki apnī zaat ko zindāñ banā liyā

gumrāh to hue the magar ḳhud ko pā liyā

apne hī aa.ine se tumhārā pata liyā

in nā-tavāniyoñ pe bhī the itne ḳhud-nigar

ye zindagī kā koh-e-girāñ bhī uThā liyā

āñkhoñ se motiyoñ kā hai tāñtā bañdhā huā

Duube haiñ is tarah ki samundar churā liyā

bas ik shu'ūr-e-rāh-navardī thā ās-pās

kyā kyā na rāstoñ meñ luTeroñ ne aa liyā

Duube haiñ ham to biich bhañvar meñ magar batā

sāhil pe jā ke tū ne bhī kyā nā-ḳhudā liyā

ḳhud bhī to imtihān-e-vafā se guzar ke dekh

tū ne to laakh baar hameñ aazmā liyā

is daur-e-be-hunar meñ haiñ donoñ girafta-dil

kyā de sake haiñ ham bhī tumheñ aur kyā liyā

ham ne to chāhatoñ ke ḳhazāne luTā diye

duniyā ne pattharoñ ko gale se lagā liyā

me’yār-e-dostī hai ki bāzār-e-dostī

saudā mohabbatoñ kā kiyā rāstā liyā

aage nikal ga.e the bahut ham-safar 'jamīl'

ham ne bhī manziloñ pe magar un ko jā liyā

yaron ne apne apne gharon ko basa liya

ek tum ki apni zat ko zindan bana liya

gumrah to hue the magar KHud ko pa liya

apne hi aaine se tumhaara pata liya

in na-tawaniyon pe bhi the itne KHud-nigar

ye zindagi ka koh-e-giran bhi uTha liya

aankhon se motiyon ka hai tanta bandha hua

Dube hain is tarah ki samundar chura liya

bas ek shu'ur-e-rah-nawardi tha aas-pas

kya kya na raston mein luTeron ne aa liya

Dube hain hum to bich bhanwar mein magar bata

sahil pe ja ke tu ne bhi kya na-KHuda liya

KHud bhi to imtihan-e-wafa se guzar ke dekh

tu ne to lakh bar hamein aazma liya

is daur-e-be-hunar mein hain donon girafta-dil

kya de sake hain hum bhi tumhein aur kya liya

hum ne to chahaton ke KHazane luTa diye

duniya ne pattharon ko gale se laga liya

me’yar-e-dosti hai ki bazar-e-dosti

sauda mohabbaton ka kiya rasta liya

aage nikal gae the bahut ham-safar 'jamil'

hum ne bhi manzilon pe magar un ko ja liya