tujhko chahat ki qasam yun na bhulana mujhko

tujh ko chāhat kī qasam yuuñ na bhulānā mujh ko

apnī yādoñ ke gulistāñ meñ sajānā mujh ko

'umr bhar saath nibhāne ke kiye haiñ vā'de

ab judā ho ke kahīñ chhoḌ na jaanā mujh ko

vāsta rab kā tujhe yuuñ bhī na nafrat karnā

bas mohabbat se zarā dil meñ basānā mujh ko

tujh se hālāt ke patthar na sahe jā.eñge

apne ehsās kā ā.īna banānā mujh ko

tū ne baḳhshe haiñ ye shohrat ke jazīre be-shak

ab takabbur ke bhī daldal se bachānā mujh ko

be-samar hī sahī āñgan kā shajar huuñ tere

gar maiñ saaya bhī na de pā.ūñ girānā mujh ko

dushmanī yuuñ to sabhī log kiyā karte haiñ

tū paḌosī hai mirā dost banānā mujh ko

ab amīrī kā nasha hai to rakho duur mujhe

jab ġharībī tumheñ ghere to bulānā mujh ko

gar huuñ kāñTā to kisī aag meñ rakh denā 'habīb'

aur patthar huuñ to raste se haTānā mujh ko

tujh ko chahat ki qasam yun na bhulana mujh ko

apni yaadon ke gulistan mein sajaana mujh ko

'umr bhar sath nibhane ke kiye hain wa'de

ab juda ho ke kahin chhoD na jaana mujh ko

wasta rab ka tujhe yun bhi na nafrat karna

bas mohabbat se zara dil mein basana mujh ko

tujh se haalat ke patthar na sahe jaenge

apne ehsas ka aaina banana mujh ko

tu ne baKHshe hain ye shohrat ke jazire be-shak

ab takabbur ke bhi daldal se bachana mujh ko

be-samar hi sahi aangan ka shajar hun tere

gar main saya bhi na de paun girana mujh ko

dushmani yun to sabhi log kiya karte hain

tu paDosi hai mera dost banana mujh ko

ab amiri ka nasha hai to rakho dur mujhe

jab gharibi tumhein ghere to bulana mujh ko

gar hun kanTa to kisi aag mein rakh dena 'habib'

aur patthar hun to raste se haTana mujh ko