likhiye siyahi-e-gham-e-dauran se apna nam

likhiye siyāhī-e-ġham-e-daurāñ se apnā naam

paḌhiye ki ham jabīn-e-sahar par raqam bhī haiñ

kaise hameñ muarriḳh-e-tārīḳh-e-daur-e-nau

samjhā.iye ki haath hamāre qalam bhī haiñ

ye bhī kaheñ ki ham ko ḳhushī bhī huī nasīb

ye bhī likheñ ki kushta-e-teġh-e-sitam bhī haiñ

ye bhī ġhalat ki zahr piyā hai tamām 'umr

ye bhī ba-jā ki vāqif-e-sad-kaif-o-kam bhī haiñ

sach hai ki vāldain ne dukh bhī bahut diye

haq hai ki vāldain ke lutf-o-karam bhī haiñ

dekho to dostoñ kī haiñ tash.hīr kā sabab

samjho to dostoñ kī anā kā bharam bhī haiñ

maano to har nigāh hai apnī ḳhudā-parast

puujo to apne zehn meñ lākhoñ sanam bhī haiñ

phailī hai ham se jabr-o-tashaddud kī dhuup bhī

ham is zamīñ pe sāya-e-abr-e-karam bhī haiñ

be-ḳhānumāñ haiñ shahr meñ 'izzat nahīñ magar

masnad-nashīn-e-qasr-o-vaqār-o-hasham bhī haiñ

ye lafz apne daur kī tārīḳh haiñ ki ham

fankār bhī haiñ vāris-e-lauh-o-qalam bhī haiñ

likhiye siyahi-e-gham-e-dauran se apna nam

paDhiye ki hum jabin-e-sahar par raqam bhi hain

kaise hamein muarriKH-e-tariKH-e-daur-e-nau

samjhaiye ki hath hamare qalam bhi hain

ye bhi kahen ki hum ko KHushi bhi hui nasib

ye bhi likhen ki kushta-e-tegh-e-sitam bhi hain

ye bhi ghalat ki zahr piya hai tamam 'umr

ye bhi ba-ja ki waqif-e-sad-kaif-o-kam bhi hain

sach hai ki waldain ne dukh bhi bahut diye

haq hai ki waldain ke lutf-o-karam bhi hain

dekho to doston ki hain tashhir ka sabab

samjho to doston ki ana ka bharam bhi hain

mano to har nigah hai apni KHuda-parast

pujo to apne zehn mein lakhon sanam bhi hain

phaili hai hum se jabr-o-tashaddud ki dhup bhi

hum is zamin pe saya-e-abr-e-karam bhi hain

be-KHanuman hain shahr mein 'izzat nahin magar

masnad-nashin-e-qasr-o-waqar-o-hasham bhi hain

ye lafz apne daur ki tariKH hain ki hum

fankar bhi hain waris-e-lauh-o-qalam bhi hain