himmat-e-parda-dari ko DhunDhiye

himmat-e-parda-darī ko DhūñDhiye

DhūñDhiye dīda-varī ko DhūñDhiye

jab ḳhudā dil meñ hai us kī kyā talāsh

is jahāñ meñ aadmī ko DhūñDhiye

jis kī āñkhoñ meñ nahīñ aañsū kī buuñd

us ke lab par kyā hañsī ko DhūñDhiye

maut ko paanā to kuchh mushkil nahīñ

hausla ho zindagī ko DhūñDhiye

dushmanī jis kī na zid ho dahr meñ

is tarah kī dostī ko DhūñDhiye

munkashif jis par ho rāz-e-be-ḳhudī

aisī koī āgahī ko DhūñDhiye

jis meñ paa.e ham surāġh-e-sub.h-e-nau

phir usī tīra-shabī ko DhūñDhiye

maut kī pahnā.iyoñ meñ ai 'azīz'

e'timād-e-zindagī ko DhūñDhiye

himmat-e-parda-dari ko DhunDhiye

DhunDhiye dida-wari ko DhunDhiye

jab KHuda dil mein hai us ki kya talash

is jahan mein aadmi ko DhunDhiye

jis ki aankhon mein nahin aansu ki bund

us ke lab par kya hansi ko DhunDhiye

maut ko pana to kuchh mushkil nahin

hausla ho zindagi ko DhunDhiye

dushmani jis ki na zid ho dahr mein

is tarah ki dosti ko DhunDhiye

munkashif jis par ho raaz-e-be-KHudi

aisi koi aagahi ko DhunDhiye

jis mein pae hum suragh-e-subh-e-nau

phir usi tira-shabi ko DhunDhiye

maut ki pahnaiyon mein ai 'aziz'

e'timad-e-zindagi ko DhunDhiye