bole wo ghair se ki suno ek hansi ki baat

bole vo ġhair se ki suno ik hañsī kī baat

samjhe the 'āshiqī ko 'qamar' dil-lagī kī baat

pūchhā kabhī miloge to bole kabhī nahīñ

pūchhā ye koī baat kahā apne jī kī baat

kyuuñ be-vafā ko dost banāyā thā kyā kahūñ

qismat kā pher 'aql kī ḳhūbī ghaḌī kī baat

merā mu'āmla ho ki dil kā mu'āmla

tum ne kabhī kahī na kaho munsifī kī baat

bāheñ gale meñ Daal ke dil māñgte haiñ vo

ye dostī kī baat hai yā dushmanī kī baat

kahte haiñ us se haal jo kuchh sun samajh sake

but haiñ ye kyā suneñge kisī aadmī kī baat

maiñ un kā jāñ-nisār vo mere ‘adū-e-jāñ

ye mere dil kī baat vo un kī ḳhushī kī baat

rahm un ko mere haal par aayā to keh ga.e

to ye hai aaj se na suneñge kisī kī baat

kyā pūchhte ho dil ko vo kis tarh le ga.e

kuchh yaad ho 'qamar' to kahūñ be-ḳhudī kī baat

bole wo ghair se ki suno ek hansi ki baat

samjhe the 'ashiqi ko 'qamar' dil-lagi ki baat

puchha kabhi miloge to bole kabhi nahin

puchha ye koi baat kaha apne ji ki baat

kyun be-wafa ko dost banaya tha kya kahun

qismat ka pher 'aql ki KHubi ghaDi ki baat

mera mu'amla ho ki dil ka mu'amla

tum ne kabhi kahi na kaho munsifi ki baat

bahen gale mein Dal ke dil mangte hain wo

ye dosti ki baat hai ya dushmani ki baat

kahte hain us se haal jo kuchh sun samajh sake

but hain ye kya sunenge kisi aadmi ki baat

main un ka jaan-nisar wo mere ‘adu-e-jaan

ye mere dil ki baat wo un ki KHushi ki baat

rahm un ko mere haal par aaya to keh gae

to ye hai aaj se na sunenge kisi ki baat

kya puchhte ho dil ko wo kis tarh le gae

kuchh yaad ho 'qamar' to kahun be-KHudi ki baat