din ek ke baad ek guzarte hue bhi dekh

din ik ke baa'd ek guzarte hue bhī dekh

ik din tū apne aap ko marte hue bhī dekh

har vaqt khilte phuul kī jānib takā na kar

murjhā ke pattiyoñ ko bikharte hue bhī dekh

haañ dekh barf girtī huī baal baal par

tapte hue ḳhayāl ThiThurte hue bhī dekh

apnoñ meñ rah ke kis liye sahmā huā hai tū

aa mujh ko dushmanoñ se na Darte hue bhī dekh

paivand bādaloñ ke lage dekh jā-ba-jā

bagloñ ko āsmān katarte hue bhī dekh

hairān mat ho tairtī machhlī ko dekh kar

paanī meñ raushnī ko utarte hue bhī dekh

us ko ḳhabar nahīñ hai abhī apne husn kī

ā.īna de ke bante-e-sañvarte hue bhī dekh

dekhā na hogā tū ne magar intizār meñ

chalte hue samay ko Thaharte hue bhī dekh

tārīf sun ke dost se 'alvī' tū ḳhush na ho

us ko tirī burā.iyāñ karte hue bhī dekh

din ek ke ba'd ek guzarte hue bhi dekh

ek din tu apne aap ko marte hue bhi dekh

har waqt khilte phul ki jaanib taka na kar

murjha ke pattiyon ko bikharte hue bhi dekh

han dekh barf girti hui baal baal par

tapte hue KHayal ThiThurte hue bhi dekh

apnon mein rah ke kis liye sahma hua hai tu

aa mujh ko dushmanon se na Darte hue bhi dekh

paiwand baadalon ke lage dekh ja-ba-ja

baglon ko aasman katarte hue bhi dekh

hairan mat ho tairti machhli ko dekh kar

pani mein raushni ko utarte hue bhi dekh

us ko KHabar nahin hai abhi apne husn ki

aaina de ke bante-e-sanwarte hue bhi dekh

dekha na hoga tu ne magar intizar mein

chalte hue samay ko Thaharte hue bhi dekh

tarif sun ke dost se 'alwi' tu KHush na ho

us ko teri buraiyan karte hue bhi dekh