dilon ke mabain shak ki diwar ho rahi hai

diloñ ke mābain shak kī dīvār ho rahī hai

to kyā judā.ī kī raah hamvār ho rahī hai

zarā sā mujh ko bhī tajraba kam hai rāste kā

zarā sī terī bhī tez raftār ho rahī hai

udhar se bhī jo chāhiye thā nahīñ milā hai

idhar hamārī bhī umr be-kār ho rahī hai

shadīd garmī meñ kaise nikle vo phūl-chehra

so apne raste meñ dhuup dīvār ho rahī hai

bas ik ta.alluq ne merī nīndeñ uḌā rakhī haiñ

bas ik shanāsā.ī jaañ kā āzār ho rahī hai

yahāñ se qissa shurūa hotā hai qatl-o-ḳhūñ kā

yahāñ se ye dāstāñ mazedār ho rahī hai

ye log duniyā ko kis taraf le ke jā rahe haiñ

ye log jin kī zabān talvār ho rahī hai

dilon ke mabain shak ki diwar ho rahi hai

to kya judai ki rah hamwar ho rahi hai

zara sa mujh ko bhi tajraba kam hai raste ka

zara si teri bhi tez raftar ho rahi hai

udhar se bhi jo chahiye tha nahin mila hai

idhar hamari bhi umr be-kar ho rahi hai

shadid garmi mein kaise nikle wo phul-chehra

so apne raste mein dhup diwar ho rahi hai

bas ek talluq ne meri ninden uDa rakhi hain

bas ek shanasai jaan ka aazar ho rahi hai

yahan se qissa shurua hota hai qatl-o-KHun ka

yahan se ye dastan mazedar ho rahi hai

ye log duniya ko kis taraf le ke ja rahe hain

ye log jin ki zaban talwar ho rahi hai