پہلے لگا کہ دور وہ جانے لگے بہت

پہلے لگا کہ دور وہ جانے لگے بہت

پھر یوں ہوا کہ یاد وہ آنے لگے بہت

ویران دل میں پھر تری یادوں کے قافلے

رفتار دھڑکنوں کی بڑھانے لگے بہت

یہ انتشار ٹکڑوں میں یونہی نہیں ہوا

دراصل میرے دل پہ نشانے لگے بہت

بھولا نہیں ہوں آج بھی یہ اور بات ہے

یہ درد دل بھلانے کو شانے لگے بہت

ہم کو کسی کے سنگ سے دقت نہیں ہوئی

لیکن ترے دیے ہوئے طعنے لگے بہت

جب تک تھی زندگی تو رلایا گیا مجھے

آنکھیں ہوئیں جو بند منانے لگے بہت

دانشؔ یہ کیسا دور محبت ہے دیکھیے

محبوب ہیں جو دل کو دکھانے لگے بہت