دل کو مرض ملا ہے کسی دل نواز سے

دل کو مرض ملا ہے کسی دل نواز سے

ہے رابطہ فضول کسی چارہ ساز سے

الجھی ہوئی ہے زندگی زلف دراز سے

بچنا ہے اب محال تری چشم ناز سے

دل مطمئن بہت تھا گناہوں کے درمیاں

جب تک ملی نہ آنکھ کسی پاکباز سے

ٹوٹا تھا اس قدر مرا آئینۂ حیات

جوڑا نہ جا سکا کسی آئینہ ساز سے

گر خیریت عزیز ہو دل کی ذرا تجھے

ہرگز نہ کرنا گفتگو اس فتنہ ساز سے

یوں ہی نہیں کہا ہے خدا تجھ کو اے خدا

سجدے کیے ہیں میں نے جبین نیاز سے

رفتار زندگی کی بڑھانے کے واسطے

کرنا پڑا نباہ پھر اک جلدباز سے

مشتاقؔ کیوں اجالوں کی باقی رہی نہ آس

کیا دشمنی ہوا کی ہے اب شمع ساز سے