dil ko maraz mila hai kisi dil-nawaz se

dil ko maraz milā hai kisī dil-navāz se

hai rābta fuzūl kisī chāra-sāz se

uljhī huī hai zindagī zulf-e-darāz se

bachnā hai ab muhāl tirī chashm-e-nāz se

dil mutma.in bahut thā gunāhoñ ke darmiyāñ

jab tak milī na aañkh kisī pāk-bāz se

TuuTā thā is qadar mirā ā.īna-e-hayāt

joḌā na jā sakā kisī ā.īna-sāz se

gar ḳhairiyat 'azīz ho dil kī zarā tujhe

hargiz na karnā guftugū us fitna-sāz se

yuuñ hī nahīñ kahā hai ḳhudā tujh ko ai ḳhudā

sajde kiye haiñ maiñ ne jabīn-e-niyāz se

raftār zindagī kī baḌhāne ke vāste

karnā paḌā nibāh phir ik jald-bāz se

'mushtāq' kyuuñ ujāloñ kī baaqī rahī na aas

kyā dushmanī havā kī hai ab sham'-sāz se

dil ko maraz mila hai kisi dil-nawaz se

hai rabta fuzul kisi chaara-saz se

uljhi hui hai zindagi zulf-e-daraaz se

bachna hai ab muhaal teri chashm-e-naz se

dil mutmain bahut tha gunahon ke darmiyan

jab tak mili na aankh kisi pak-baz se

TuTa tha is qadar mera aaina-e-hayat

joDa na ja saka kisi aaina-saz se

gar KHairiyat 'aziz ho dil ki zara tujhe

hargiz na karna guftugu us fitna-saz se

yun hi nahin kaha hai KHuda tujh ko ai KHuda

sajde kiye hain main ne jabin-e-niyaz se

raftar zindagi ki baDhane ke waste

karna paDa nibah phir ek jald-baz se

'mushtaq' kyun ujalon ki baqi rahi na aas

kya dushmani hawa ki hai ab sham'-saz se