wo ashk-fishan zabt-e-fughan bol raha hai

vo ashk-fishāñ zabt-e-fuġhāñ bol rahā hai

rah rah ke koī dard javāñ bol rahā hai

hālāñki sabhī log chhupāne meñ lage haiñ

sulgī hai kahīñ aag dhuāñ bol rahā hai

barbād mohabbat kā hasīñ dard taḌap kar

hamrāz kī dhaḌkan meñ nihāñ bol rahā hai

maiñ jis ke liye saare zamāne se laḌā thā

ab mere liye vo bhī kahāñ bol rahā hai

dushman to farishte kī tarah puuj rahe haiñ

jo dost hai dushman kī zabāñ bol rahā hai

apnī to kabhī fikr bhī itnī nahīñ girtī

vo sāhib-e-kirdār jahāñ bol rahā hai

har baat pe sheḳhī kī zabāñ bolne vaale

ye tū nahīñ shohrat kā gumāñ bol rahā hai

bārīk sā thā farq jo samjhā nahīñ tum ne

maiñ bol rahā huuñ ki jahāñ bol rahā hai

wo ashk-fishan zabt-e-fughan bol raha hai

rah rah ke koi dard jawan bol raha hai

haalanki sabhi log chhupane mein lage hain

sulgi hai kahin aag dhuan bol raha hai

barbaad mohabbat ka hasin dard taDap kar

hamraaz ki dhaDkan mein nihan bol raha hai

main jis ke liye sare zamane se laDa tha

ab mere liye wo bhi kahan bol raha hai

dushman to farishte ki tarah puj rahe hain

jo dost hai dushman ki zaban bol raha hai

apni to kabhi fikr bhi itni nahin girti

wo sahib-e-kirdar jahan bol raha hai

har baat pe sheKHi ki zaban bolne wale

ye tu nahin shohrat ka guman bol raha hai

barik sa tha farq jo samjha nahin tum ne

main bol raha hun ki jahan bol raha hai