dhuan dhuan si faza mein hai kainat abhi

dhuāñ dhuāñ sī fazā meñ hai kā.ināt abhī

nikhar sakā na koī manzar-e-hayāt abhī

ham un se mil ke ye mahsūs karne lagte haiñ

jahāñ meñ baaqī hai rasm-e-takallufāt abhī

sunā chukūñ to unheñ dāstān-e-hasrat-e-dil

ḳhudā kare ki rahe ek din to raat abhī

unheñ ga.e hue 'arsa huā magar jaise

hai mere haath meñ vo narm narm haat abhī

nigāh-e-mehr ho yā qahr ho magar kuchh ho

umīd-vār hai mahrūm-e-iltifāt abhī

kahīñ to chāñd sitāre haiñ ġhard-e-rāh-e-hayāt

kahīñ diloñ pe hai gard-e-tavahhumāt abhī

ġham-e-habīb meñ jī se guzar ga.e 'tābāñ'

ġham-e-hayāt se hai zindagī kā saat abhī

dhuan dhuan si faza mein hai kainat abhi

nikhar saka na koi manzar-e-hayat abhi

hum un se mil ke ye mahsus karne lagte hain

jahan mein baqi hai rasm-e-takallufat abhi

suna chukun to unhen dastan-e-hasrat-e-dil

KHuda kare ki rahe ek din to raat abhi

unhen gae hue 'arsa hua magar jaise

hai mere hath mein wo narm narm hat abhi

nigah-e-mehr ho ya qahr ho magar kuchh ho

umid-war hai mahrum-e-iltifat abhi

kahin to chand sitare hain ghard-e-rah-e-hayat

kahin dilon pe hai gard-e-tawahhumat abhi

gham-e-habib mein ji se guzar gae 'taban'

gham-e-hayat se hai zindagi ka sat abhi