kuchh is tarah se KHud ko munazzam karunga main

kuchh is tarah se ḳhud ko munazzam karūñgā maiñ

ulfat kā diip tez hai so kam karūñgā maiñ

aatī hai āsmān se bārish bhī dhuup bhī

apne ġhamoñ ko dekhnā marham karūñgā maiñ

murjhā gayā thā phuul mirā chhoTī 'umr meñ

apnī har ek saañs pe mātam karūñgā maiñ

shab bhar kisī kī yaad meñ har phuul rotā hai

dāman kisī kī yaad meñ ab nam karūñgā maiñ

har ek apnī baat ko behtar batātā hai

kab tak anā ke dahr meñ ham ham karūñgā maiñ

girtā rahā jo paanī to patthar meñ naqsh hai

ulfat kī dauḌ bhaag ko paiham karūñgā maiñ

ye husn kā jahān bahut chāl-bāz hai

tasḳhīr har tarah se ye 'ālam karūñgā maiñ

hamdam ne aa ke mujh se faqat thoḌī baat kī

tujh ko shifā milegī agar dam karūñgā maiñ

ḳhud ko sunā rahā huuñ abhī dāstān-e-hijr

'maqsūd' dil-fareb ye mausam karūñgā maiñ

kuchh is tarah se KHud ko munazzam karunga main

ulfat ka dip tez hai so kam karunga main

aati hai aasman se barish bhi dhup bhi

apne ghamon ko dekhna marham karunga main

murjha gaya tha phul mera chhoTi 'umr mein

apni har ek sans pe matam karunga main

shab bhar kisi ki yaad mein har phul rota hai

daman kisi ki yaad mein ab nam karunga main

har ek apni baat ko behtar batata hai

kab tak ana ke dahr mein hum hum karunga main

girta raha jo pani to patthar mein naqsh hai

ulfat ki dauD bhag ko paiham karunga main

ye husn ka jahan bahut chaal-baz hai

tasKHir har tarah se ye 'alam karunga main

hamdam ne aa ke mujh se faqat thoDi baat ki

tujh ko shifa milegi agar dam karunga main

KHud ko suna raha hun abhi dastan-e-hijr

'maqsud' dil-fareb ye mausam karunga main