sar paTakta raha shab bhar mera sauda-e-junun

sar paTaktā rahā shab bhar mirā saudā-e-junūñ

ḳhvāb chillāte rahe haa.e junūñ haa.e junūñ

mujh ko ik lamha bhī tanhā nahīñ rahne detī

raqs-andāz hai har saañs meñ lailā-e-junūñ

shor kartī hai bahut merī ḳhush-āvāz hañsī

josh meñ aatā hai jab jab mirā dariyā-e-junūñ

tishnagī had se guzartī hai to pī letā huuñ

apnī āñkhoñ se Tapaktī huī sahbā-e-junūñ

kyā mazā ho jo shab-e-hijr mujhe de na.e ġham

aur har ġham pe na.e Dhang se bal khaa.e junūñ

shiddat-e-zabt ne baḳhshī hai kuchh aisī vahshat

DhūñDte phirte haiñ mujh ko sabhī jūyā-e-junūñ

laao ab is se bhī kuchh tez kisī dhun kā surāġh

kab talak apne qadam maut pe thirkā.e junūñ

merī tasvīr dikhā kar kahā jaatā hai 'safīr'

dekh lo aisā nazar aatā hai maulā-e-junūñ

sar paTakta raha shab bhar mera sauda-e-junun

KHwab chillate rahe hae junun hae junun

mujh ko ek lamha bhi tanha nahin rahne deti

raqs-andaz hai har sans mein laila-e-junun

shor karti hai bahut meri KHush-awaz hansi

josh mein aata hai jab jab mera dariya-e-junun

tishnagi had se guzarti hai to pi leta hun

apni aankhon se Tapakti hui sahba-e-junun

kya maza ho jo shab-e-hijr mujhe de nae gham

aur har gham pe nae Dhang se bal khae junun

shiddat-e-zabt ne baKHshi hai kuchh aisi wahshat

DhunDte phirte hain mujh ko sabhi juya-e-junun

lao ab is se bhi kuchh tez kisi dhun ka suragh

kab talak apne qadam maut pe thirkae junun

meri taswir dikha kar kaha jata hai 'safir'

dekh lo aisa nazar aata hai maula-e-junun