be-sabab aam nahin baat ye jaana dil ka

be-sabab 'aam nahīñ baat ye jaanā dil kā

kuchh to hai raaz badal de jo Thikānā dil kā

aap rukte zarā khultā ye fasāna dil kā

kis ne luuTā hai ḳhazānoñ se ḳhazāna dil kā

us taraf dekh ke ḳhud ko hī jalānā dil kā

yaad aatā hai mujhe daur purānā dil kā

aap gar hoñ na to hotā nahīñ dil kā koī

aap hote haiñ to hotā hai zamāna dil kā

vaah kyā daad maiñ duuñ bas ki palak jhapkī thī

kaise mumkin huā itne meñ churānā dil kā

yuuñ ki dīvāngī dekhe to batā.e koī

dekh kar un ko vo bas shor machānā dil kā

aap rukiye zarā dikhne ko 'ajab manzar hai

un kī yādoñ ke nishānāt miTānā dil kā

husn vāloñ se guzārish hai ki ruḳhsat de deñ

aap kī yaad se behtar hai khapānā dil kā

husn vāloñ ko faqat aatā hai qaabū karnā

kitnā mushkil hai na jāneñ ye kamānā dil kā

chāra-gar ab tire nusḳhe hue nāqis kyūñkar

achchhā-ḳhāsā tumheñ aatā thā dukhānā dil kā

ruḳh-e-shaffāf dikhāyā jo sharārat sūjhī

phir na mumkin huā pahlū meñ samānā dil kā

aañkh se aañkh milā.ī to gayā hāthoñ se

kitnā āsāñ rahā ham ko ye gañvānā dil kā

ek do aur bhī gar hote to bachte kyūñkar

thā mujhe ḳhud hī ye manzūr luTānā dil kā

ek hī dil thā gayā haath se mere vo bhī

bāñdh kar baiThe ho kyuuñ ab bhī nishānā dil kā

dil ko manzūr nahīñ rāh-e-jahāñ par chalnā

munfarid hotā hai sab hī se tarānā dil kā

aa ke dekhe mujhe jis ko bhī ho shub.ha koī

kaun kahtā hai ki āsāñ hai bachānā dil kā

un kī yādoñ meñ na baaqī rahī shiddat shāyad

'arsalān' aaj kahā tum ne na maanā dil kā

be-sabab 'am nahin baat ye jaana dil ka

kuchh to hai raaz badal de jo Thikana dil ka

aap rukte zara khulta ye fasana dil ka

kis ne luTa hai KHazanon se KHazana dil ka

us taraf dekh ke KHud ko hi jalana dil ka

yaad aata hai mujhe daur purana dil ka

aap gar hon na to hota nahin dil ka koi

aap hote hain to hota hai zamana dil ka

wah kya dad main dun bas ki palak jhapki thi

kaise mumkin hua itne mein churana dil ka

yun ki diwangi dekhe to batae koi

dekh kar un ko wo bas shor machana dil ka

aap rukiye zara dikhne ko 'ajab manzar hai

un ki yaadon ke nishanat miTana dil ka

husn walon se guzarish hai ki ruKHsat de den

aap ki yaad se behtar hai khapana dil ka

husn walon ko faqat aata hai qabu karna

kitna mushkil hai na jaanen ye kamana dil ka

chaara-gar ab tere nusKHe hue naqis kyunkar

achchha-KHasa tumhein aata tha dukhana dil ka

ruKH-e-shaffaf dikhaya jo shararat sujhi

phir na mumkin hua pahlu mein samana dil ka

aankh se aankh milai to gaya hathon se

kitna aasan raha hum ko ye ganwana dil ka

ek do aur bhi gar hote to bachte kyunkar

tha mujhe KHud hi ye manzur luTana dil ka

ek hi dil tha gaya hath se mere wo bhi

bandh kar baiThe ho kyun ab bhi nishana dil ka

dil ko manzur nahin rah-e-jahan par chalna

munfarid hota hai sab hi se tarana dil ka

aa ke dekhe mujhe jis ko bhi ho shubha koi

kaun kahta hai ki aasan hai bachana dil ka

un ki yaadon mein na baqi rahi shiddat shayad

'arsalan' aaj kaha tum ne na mana dil ka