payam dasht ke parwardigar lae hain

payām dasht ke parvardigār laa.e haiñ

suno asīr-e-ḳhizāñ ham bahār laa.e haiñ

kaho to raḳht-e-safar aur muḳhtasar kar leñ

jo qāfile meñ badan kā ġhubār laa.e haiñ

har ek dil meñ dar aa.ī farāz kī ḳhvāhish

ye ḳhvāb jab se mujhe sū-e-dār laa.e haiñ

ḳhudā hai madd-e-muqābil so ehtijājan log

gharoñ se ab tirī tasvīr utaar laa.e haiñ

jahāñ nazar meñ tirā ġham bhī mo'tabar na rahā

mujhe vahāñ bhī junūñ ke hisār laa.e haiñ

use kaho na kare mustarad ḳhayāl-e-visāl

ki ham qazā se ye lamhe udhār laa.e haiñ

payam dasht ke parwardigar lae hain

suno asir-e-KHizan hum bahaar lae hain

kaho to raKHt-e-safar aur muKHtasar kar len

jo qafile mein badan ka ghubar lae hain

har ek dil mein dar aai faraaz ki KHwahish

ye KHwab jab se mujhe su-e-dar lae hain

KHuda hai madd-e-muqabil so ehtijajan log

gharon se ab teri taswir utar lae hain

jahan nazar mein tera gham bhi mo'tabar na raha

mujhe wahan bhi junun ke hisar lae hain

use kaho na kare mustarad KHayal-e-visal

ki hum qaza se ye lamhe udhaar lae hain