bain karti hui phirti hai hawa sine mein

bain kartī huī phirtī hai havā siine meñ

hai ka.ī roz se ḳhāmosh ḳhudā siine meñ

rafta rafta ye nigal jā.egā dil kī kārez

ham liye phirte haiñ ik dasht-e-balā siine meñ

tere chehre ke ḳhad-o-ḳhāl ubhar ā.eñge

ḳhuun kī dhaar girā aur zarā siine meñ

le ye ġharqābī-e-jāñ kā bhī tamāshā ab dekh

maiñ na kahtā thā ki tūfāñ na uThā siine meñ

maiñ to us din tujhe mānūñgā kushāda dil kā

ik jagah mere liye bhī tū banā siine meñ

ab vo āñkheñ hī nahīñ jin se lahū rote the

varna kyā hotā nahīñ shor-e-‘azā siine meñ

pahle har aan bapā rahtā thā ik jashn 'nadīm'

ab rahā kartī hai bas hū kī sadā siine meñ

bain karti hui phirti hai hawa sine mein

hai kai roz se KHamosh KHuda sine mein

rafta rafta ye nigal jaega dil ki karez

hum liye phirte hain ek dasht-e-bala sine mein

tere chehre ke KHad-o-KHal ubhar aaenge

KHun ki dhaar gira aur zara sine mein

le ye gharqabi-e-jaan ka bhi tamasha ab dekh

main na kahta tha ki tufan na uTha sine mein

main to us din tujhe manunga kushada dil ka

ek jagah mere liye bhi tu bana sine mein

ab wo aankhen hi nahin jin se lahu rote the

warna kya hota nahin shor-e-‘aza sine mein

pahle har aan bapa rahta tha ek jashn 'nadim'

ab raha karti hai bas hu ki sada sine mein