tamir hui KHak ki duniya mere aage

tā'mīr huī ḳhaak kī duniyā mire aage

ik nuur thā ik zaat thī tanhā mire aage

phir mauj-e-tasavvur ne banāyā koī dariyā

aur Duub gayā naqsh-e-tamannā mire aage

jab dekh liyā naqsh-e-qadīm-e-shab-e-hijrāñ

phir chaak huā dil kā sahīfa mire aage

maiñ ḳhud hī tamāshā huuñ tamāshā.ī bhī ḳhud huuñ

phir kaun dikhā.egā tamāshā mire aage

ik nuur ne chhū lī mirī ḳhāmosh nigāheñ

aur khul gayā bātin kā darīcha mire aage

'rāshid' ye tajallī bhī 'ajab khel dikhā.e

parda bhī vahī aur vahī chehra mire aage

ta'mir hui KHak ki duniya mere aage

ek nur tha ek zat thi tanha mere aage

phir mauj-e-tasawwur ne banaya koi dariya

aur Dub gaya naqsh-e-tamanna mere aage

jab dekh liya naqsh-e-qadim-e-shab-e-hijran

phir chaak hua dil ka sahifa mere aage

main KHud hi tamasha hun tamashai bhi KHud hun

phir kaun dikhaega tamasha mere aage

ek nur ne chhu li meri KHamosh nigahen

aur khul gaya baatin ka daricha mere aage

'rashid' ye tajalli bhi 'ajab khel dikhae

parda bhi wahi aur wahi chehra mere aage