ab to nahin raha mujhe KHwabon pe etibar

ab to nahīñ rahā mujhe ḳhvāboñ pe e'tibār

karne lagā huuñ jāgtī āñkhoñ pe e'tibār

tum ko nahīñ patā hai ki kyā mo'jiza huā

dariyā ko ho gayā hai kināroñ pe e'tibār

baiThe haiñ dhuup meñ vo charāġhāñ kiye hue

hotā nahīñ hai jin ko kitāboñ pe e'tibār

jab rāste zamīñ ke dikhā.ī na deñ tumheñ

ik baar kar ke dekho sitāroñ pe e'tibār

Darne lage haiñ vaqt ke hākim baḌe baḌe

karne lage haiñ log savāloñ pe e'tibār

koī 'malāz' apnā nigahbāñ nahīñ rahā

karte raheñge apnī hī ġhazloñ pe e'tibār

ab to nahin raha mujhe KHwabon pe e'tibar

karne laga hun jagti aankhon pe e'tibar

tum ko nahin pata hai ki kya mo'jiza hua

dariya ko ho gaya hai kinaron pe e'tibar

baiThe hain dhup mein wo charaghan kiye hue

hota nahin hai jin ko kitabon pe e'tibar

jab raste zamin ke dikhai na den tumhein

ek bar kar ke dekho sitaron pe e'tibar

Darne lage hain waqt ke hakim baDe baDe

karne lage hain log sawalon pe e'tibar

koi 'malaz' apna nigahban nahin raha

karte rahenge apni hi ghazlon pe e'tibar