mat ghusse ke shole sun jalte kun jalati ja

mat ġhusse ke sho'le suuñ jalte kuuñ jalātī jā

Tuk mehr ke paanī suuñ tū aag bujhātī jā

tujh chaal kī qīmat suuñ dil na.iñ hai mirā vāqif

ai maan bharī chanchal Tuk bhaav batātī jā

is raat añdhārī meñ mat bhuul paḌūñ tujh suuñ

Tuk paañv ke jhāñjhar kī jhankār sunātī jā

mujh dil ke kabūtar kuuñ bāñdhā hai tirī laT ne

ye kaam dharam kā hai Tuk is ko chhuḌātī jā

tujh mukh kī parastish meñ ga.ī 'umr mirī saarī

ai but kī pujan-hārī Tuk is ko pujātī jā

tujh 'ishq meñ jal-jal kar sab tan kuuñ kiyā kājal

ye raushnī-afzā hai añkhiyāñ ko lagātī jā

tujh neh meñ dil jal-jal jogī kī liyā sūrat

yak-bār ise mohan chhātī suuñ lagātī jā

tujh ghar kī taraf sundar aatā hai 'valī' daa.im

mushtāq daras kā hai Tuk dars dikhātī jā

mat ghusse ke sho'le sun jalte kun jalati ja

Tuk mehr ke pani sun tu aag bujhati ja

tujh chaal ki qimat sun dil nain hai mera waqif

ai man bhari chanchal Tuk bhaw batati ja

is raat andhaari mein mat bhul paDun tujh sun

Tuk panw ke jhanjhar ki jhankar sunati ja

mujh dil ke kabutar kun bandha hai teri laT ne

ye kaam dharam ka hai Tuk is ko chhuDati ja

tujh mukh ki parastish mein gai 'umr meri sari

ai but ki pujan-haari Tuk is ko pujati ja

tujh 'ishq mein jal-jal kar sab tan kun kiya kajal

ye raushni-afza hai ankhiyan ko lagati ja

tujh neh mein dil jal-jal jogi ki liya surat

yak-bar ise mohan chhati sun lagati ja

tujh ghar ki taraf sundar aata hai 'wali' daim

mushtaq daras ka hai Tuk dars dikhati ja