hamare daman pe khil rahe hain jo dagh sare

hamāre dāman pe khil rahe haiñ jo daaġh saare

unhī kī rangat se haiñ farozāñ ye baaġh saare

na DhūñDh mahtāb meñ koī shab kā ham-safar ab

ki ghar kī tāqoñ meñ jal rahe haiñ charāġh saare

ham ab mohabbat kā khel saudā nahīñ kareñge

kisī kī yādoñ se ab haiñ ḳhālī dimāġh saare

sukūt-e-sahrā hī ab hamāre liye hai behtar

shajar kī shāḳhoñ pe aa chuke haiñ kulāġh saare

chale ga.e chhoḌ kar vahīñ kārvāñ ke raahī

safar kī saḳhtī se gir paḌe jo ulāġh saare

milā hai rutba hameñ jahāñ meñ qalandarī kā

badal ke rakh deñge ek din ham ayāġh saare

chhupā ke baiThe haiñ jo zamāne kī kaj-kulāhī

lahū ke chhīñTe ugal hī deñge surāġh saare

'azīm' fahm-o-shu’ūr kī ik na.ī sahar ho

har ek dil tak mire jo pahuñcheñ balāġh saare

hamare daman pe khil rahe hain jo dagh sare

unhi ki rangat se hain farozan ye bagh sare

na DhunDh mahtab mein koi shab ka ham-safar ab

ki ghar ki taqon mein jal rahe hain charagh sare

hum ab mohabbat ka khel sauda nahin karenge

kisi ki yaadon se ab hain KHali dimagh sare

sukut-e-sahra hi ab hamare liye hai behtar

shajar ki shaKHon pe aa chuke hain kulagh sare

chale gae chhoD kar wahin karwan ke rahi

safar ki saKHti se gir paDe jo ulagh sare

mila hai rutba hamein jahan mein qalandari ka

badal ke rakh denge ek din hum ayagh sare

chhupa ke baiThe hain jo zamane ki kaj-kulahi

lahu ke chhinTe ugal hi denge suragh sare

'azim' fahm-o-shu’ur ki ek nai sahar ho

har ek dil tak mere jo pahunchen balagh sare