un pe KHud aashiq hai naseh aur hamein samjhae hai

un pe ḳhud 'āshiq hai nāseh aur hameñ samjhā.e hai

bas yahī bāteñ haiñ jin se aag sī lag jaa.e hai

paaoñ kyuuñ paTḳhe hai itne kyuuñ mujhe dahlā.e hai

kaun hai jo merī jānib se tujhe bhaḌkā.e hai

chat kī window meñ vo sab se kare hai guftugū

ham jab aaveñ haiñ darīcha chhoḌ kar haT jaa.e hai

baat be-bāt us ko kuchh chiḌne kī 'ādat sī bhī hai

kuchh chiḌāne meñ use ham ko maza bhī aa.e hai

dushman-e-jānī hai vo ye maiñ bhī jānūñ huuñ magar

jab nazar aave hai zālim ik ġhazal ho jaa.e hai

chup rahe hai dekh kar vo iztirāb-e-dil mirā

muskurā deve hai bas so dil bhī dhokā khaa.e hai

ik nazar le tū bhī nāseh dekh le tasvīr-e-yār

phir zarā dekhūñ tujhe bhī kis tarah chain aa.e hai

kījiye iqrār-e-ulfat dekh kar 'zāmin' kā haal

ik daf'a haañ keh diyā thā aaj tak pachhtā.e hai

un pe KHud 'ashiq hai naseh aur hamein samjhae hai

bas yahi baaten hain jin se aag si lag jae hai

paon kyun paTKHe hai itne kyun mujhe dahlae hai

kaun hai jo meri jaanib se tujhe bhaDkae hai

chat ki window mein wo sab se kare hai guftugu

hum jab aawen hain daricha chhoD kar haT jae hai

baat be-baat us ko kuchh chiDne ki 'adat si bhi hai

kuchh chiDane mein use hum ko maza bhi aae hai

dushman-e-jaani hai wo ye main bhi jaanun hun magar

jab nazar aawe hai zalim ek ghazal ho jae hai

chup rahe hai dekh kar wo iztirab-e-dil mera

muskura dewe hai bas so dil bhi dhoka khae hai

ek nazar le tu bhi naseh dekh le taswir-e-yar

phir zara dekhun tujhe bhi kis tarah chain aae hai

kijiye iqrar-e-ulfat dekh kar 'zamin' ka haal

ek daf'a han keh diya tha aaj tak pachhtae hai