shabab par hain gulon ke dimagh jalte hain

shabāb par haiñ guloñ ke dimāġh jalte haiñ

bahār sho'la-ba-dāmāñ hai baaġh jalte haiñ

tire firāq meñ yuuñ dil ke daaġh jalte haiñ

añdherī raat meñ jaise charāġh jalte haiñ

nazar bachā ke sitāroñ se milte rahiyegā

ye pā ga.e haiñ hamārā surāġh jalte haiñ

sabaq vafā kā zamāne ko maiñ paḌhātā huuñ

mire charāġh se saare charāġh jalte haiñ

ye soz-e-mai kā asar hai subū meñ rah kar bhī

baġhair aag uñDele ayāġh jalte haiñ

añdherī rāh-e-vafā kyuuñ jagar-jagar na kare

misāl-e-sham' kaleje ke daaġh jalte haiñ

jahāñ meñ ab bhī shahīdoñ ke naam raushan haiñ

bujhe haiñ phir bhī hazāroñ charāġh jalte haiñ

paḌho 'munīr' na hargiz ġhazal tarannum se

sunā hai baaġh meñ koyal se zaaġh jalte haiñ

shabab par hain gulon ke dimagh jalte hain

bahaar sho'la-ba-daman hai bagh jalte hain

tere firaq mein yun dil ke dagh jalte hain

andheri raat mein jaise charagh jalte hain

nazar bacha ke sitaron se milte rahiyega

ye pa gae hain hamara suragh jalte hain

sabaq wafa ka zamane ko main paDhata hun

mere charagh se sare charagh jalte hain

ye soz-e-mai ka asar hai subu mein rah kar bhi

baghair aag unDele ayagh jalte hain

andheri rah-e-wafa kyun jagar-jagar na kare

misal-e-sham' kaleje ke dagh jalte hain

jahan mein ab bhi shahidon ke nam raushan hain

bujhe hain phir bhi hazaron charagh jalte hain

paDho 'munir' na hargiz ghazal tarannum se

suna hai bagh mein koyal se zagh jalte hain