idhar ghurur ke dipak udhar ghazab ke charagh

idhar ġhurūr ke dīpak udhar ġhazab ke charāġh

añdherā baañT rahe haiñ hasab nasab ke charāġh

charāġh-e-zīst kī kitnī bhī dekh-bhāl karo

havā-e-maut bujhā Dāltī hai sab ke charāġh

salām un ko jo is daur-e-bad-tamīzī meñ

jalā ke rakkhe hue haiñ abhī adab ke charāġh

sahar qarīb hai sūraj nikalne vaalā hai

lihāzā bhūlne vaale haiñ log shab ke charāġh

tamām shahr pe chhā.ī huī hai ḳhud-ġharazī

mohabbatoñ ke to gul ho chuke haiñ kab ke charāġh

mire dimāġh meñ jaltā hai koī aur diyā

kisī ke dil meñ haiñ raushan mirī talab ke charāġh

ki ab sukūt kī zulmat bahut huī 'kāshif'

chalo ki khol hī dete haiñ aaj lab ke charāġh

idhar ghurur ke dipak udhar ghazab ke charagh

andhera banT rahe hain hasab nasab ke charagh

charagh-e-zist ki kitni bhi dekh-bhaal karo

hawa-e-maut bujha Dalti hai sab ke charagh

salam un ko jo is daur-e-bad-tamizi mein

jala ke rakkhe hue hain abhi adab ke charagh

sahar qarib hai suraj nikalne wala hai

lihaza bhulne wale hain log shab ke charagh

tamam shahr pe chhai hui hai KHud-gharazi

mohabbaton ke to gul ho chuke hain kab ke charagh

mere dimagh mein jalta hai koi aur diya

kisi ke dil mein hain raushan meri talab ke charagh

ki ab sukut ki zulmat bahut hui 'kashif'

chalo ki khol hi dete hain aaj lab ke charagh