badalti surat-e-haalat mein Dhalna zaruri hai

badaltī sūrat-e-hālāt meñ Dhalnā zarūrī hai

charāġh-e-vaqt ko har haal meñ jalnā zarūrī hai

kisī ke dard ko lafzoñ meñ bas likhnā nahīñ kaafī

kabhī us dard ke ham-rāh bhī chalnā zarūrī hai

maiñ apne shahr kī tanhā.iyoñ se ye samajh paa.ī

ḳhamoshī se mohabbat ke liye jalnā zarūrī hai

havā ke ruḳh pe chalne se kahāñ pahchān bantī hai

ḳhilāf-e-mauj-e-tūfāñ bhī yahāñ chalnā zarūrī hai

jo apne aap ko har roz behtar kar nahīñ paate

unheñ ā.īna le kar haath meñ chalnā zarūrī hai

jahāñ har samt patthar-dil ravayye sar uThāte hoñ

mohabbat kā vahāñ par phūlnā phalnā zarūrī hai

ye duniyā ek dariyā hai Thahar jaa.e to saḌtī hai

diloñ ke darmiyān ehsās kā palnā zarūrī hai

badalti surat-e-haalat mein Dhalna zaruri hai

charagh-e-waqt ko har haal mein jalna zaruri hai

kisi ke dard ko lafzon mein bas likhna nahin kafi

kabhi us dard ke ham-rah bhi chalna zaruri hai

main apne shahr ki tanhaiyon se ye samajh pai

KHamoshi se mohabbat ke liye jalna zaruri hai

hawa ke ruKH pe chalne se kahan pahchan banti hai

KHilaf-e-mauj-e-tufan bhi yahan chalna zaruri hai

jo apne aap ko har roz behtar kar nahin pate

unhen aaina le kar hath mein chalna zaruri hai

jahan har samt patthar-dil rawayye sar uThate hon

mohabbat ka wahan par phulna phalna zaruri hai

ye duniya ek dariya hai Thahar jae to saDti hai

dilon ke darmiyan ehsas ka palna zaruri hai