andheri raat mein KHud ko jala ke dekhte hain

añdherī raat meñ ḳhud ko jalā ke dekhte haiñ

na.e charāġh haiñ tevar havā ke dekhte haiñ

sitāre duur se un ko nazar nahīñ aate

har ek shai ko vo nazdīk jā ke dekhte haiñ

mirā vujūd hai shaffāf aa.ine kī tarah

vo dekhte haiñ to chashma lagā ke dekhte haiñ

kisī ke 'ishq meñ miT jaanā bhī 'ibādat hai

ye baat sach hai to ḳhud ko miTā ke dekhte haiñ

mire ḳhulūs pe un ko yaqīñ nahīñ shāyad

vo sab ke sāmne mujh ko bulā ke dekhte haiñ

davā se jo na huā kaam vo du'ā ne kiyā

davā ke maare karishme du'ā ke dekhte haiñ

ka.ī dinoñ se fazā.eñ udaas haiñ 'muztar'

chalo libās meñ ḳhush-bū lagā ke dekhte haiñ

andheri raat mein KHud ko jala ke dekhte hain

nae charagh hain tewar hawa ke dekhte hain

sitare dur se un ko nazar nahin aate

har ek shai ko wo nazdik ja ke dekhte hain

mera wujud hai shaffaf aaine ki tarah

wo dekhte hain to chashma laga ke dekhte hain

kisi ke 'ishq mein miT jaana bhi 'ibaadat hai

ye baat sach hai to KHud ko miTa ke dekhte hain

mere KHulus pe un ko yaqin nahin shayad

wo sab ke samne mujh ko bula ke dekhte hain

dawa se jo na hua kaam wo du'a ne kiya

dawa ke mare karishme du'a ke dekhte hain

kai dinon se fazaen udas hain 'muztar'

chalo libas mein KHush-bu laga ke dekhte hain