aae aur dukh ka kare aa ke mudawa koi

aa.e aur dukh kā kare aa ke mudāvā koī

merī duniyā meñ nahīñ mere 'alāva koī

kabhī aflāk kabhī zer-e-zamīñ rahte haiñ

ham faqīroñ kā bhī hotā hai 'ilāqa koī

mere hujre meñ faqat dil kī chamak hotī hai

aur kartā hai charāġhoñ kā taqāzā koī

dasht-e-vahshat meñ kahāñ sidq-o-safā baaqī hai

DhūñDh kar lā to idhar kaam kā banda koī

siikh ādāb-e-mohabbat dil-e-nādāñ pahle

'arz karne kā bhī hotā hai salīqa koī

dil se ehsās kī daulat kā ziyāñ ho jaanā

is se baḌh kar nahīñ duniyā meñ ḳhasāra koī

maiñ tire husn kī tā'rīf meñ kyā baat kahūñ

tū taḳhayyul hai nahīñ jis kā kināra koī

aae aur dukh ka kare aa ke mudawa koi

meri duniya mein nahin mere 'alawa koi

kabhi aflak kabhi zer-e-zamin rahte hain

hum faqiron ka bhi hota hai 'ilaqa koi

mere hujre mein faqat dil ki chamak hoti hai

aur karta hai charaghon ka taqaza koi

dasht-e-wahshat mein kahan sidq-o-safa baqi hai

DhunDh kar la to idhar kaam ka banda koi

sikh aadab-e-mohabbat dil-e-nadan pahle

'arz karne ka bhi hota hai saliqa koi

dil se ehsas ki daulat ka ziyan ho jaana

is se baDh kar nahin duniya mein KHasara koi

main tere husn ki ta'rif mein kya baat kahun

tu taKHayyul hai nahin jis ka kinara koi