kaha ye kis ne ki chehra naya lagao mat

kahā ye kis ne ki chehra nayā lagāo mat

ise lagā ke magar ā.inoñ meñ aao mat

lagā diye haiñ kisī ne jo pankh kāġhaz ke

to apne aap ko itnā miyāñ uḌaao mat

kahīñ ye dā.ira-e-tanz meñ na aa jaa.e

hamāre sāmne is tarh muskurāo mat

'ajab nahīñ ki ye duniyā gale meñ aa jaa.e

bahut ziyāda gale se ise lagāo mat

nikāle aur hī matlab vo ḳhāksārī kā

ab us ke sāmne itnā bhī sar jhukāo mat

abhī abhī to vo kuchh bolne pe aayā hai

'na'īm' abhī se use aa.ina dikhāo mat

kaha ye kis ne ki chehra naya lagao mat

ise laga ke magar aainon mein aao mat

laga diye hain kisi ne jo pankh kaghaz ke

to apne aap ko itna miyan uDao mat

kahin ye daira-e-tanz mein na aa jae

hamare samne is tarh muskurao mat

'ajab nahin ki ye duniya gale mein aa jae

bahut ziyaada gale se ise lagao mat

nikale aur hi matlab wo KHaksari ka

ab us ke samne itna bhi sar jhukao mat

abhi abhi to wo kuchh bolne pe aaya hai

'na'im' abhi se use aaina dikhao mat