haya se baalon mein chehre ko ho chhupae hue

hayā se bāloñ meñ chehre ko ho chhupā.e hue

kahāñ se aate ho jaage hue nahā.e hue

idhar bhī ek nazar dekh lo barā.e-ḳhudā

tumhārī āñkhoñ pe baiThe haiñ zahr khaa.e hue

hameñ satāo na lillāh ukhḌī bātoñ se

ham aap gardish-e-gardūñ ke haiñ satā.e hue

'azīz dāġh-e-mohabbat hai is qadar mujh ko

fanā ke baa'd bhī chhātī se huuñ lagā.e hue

fanā ke baa'd bhī gardish hai 'merī qismat meñ

liye phiregī havā ḳhaak ko uḌaa.e hue

paḌe haiñ TuuTe hue har qadam pe shīsha-e-dil

sañbhal ke raah chalo paaoñ ko bachā.e hue

savāl-e-vasl jo kartā huuñ to vo kahte haiñ

mujhī pe baiThe haiñ kyā aap zahr khaa.e hue

kamar pe yaar kī hāthoñ kā bojh kyā Dālūñ

vo aap gesuoñ ke baar haiñ uThā.e hue

kafan meñ yaar kī tasvīr rakh deñ dafn ke vaqt

lahad se uTThūñgā us ko gale lagā.e hue

chalā huuñ sone ko pahlū-e-qabr meñ 'kāmil'

jigar pe teġh-e-mohabbat kā zaḳhm khaa.e hue

haya se baalon mein chehre ko ho chhupae hue

kahan se aate ho jage hue nahae hue

idhar bhi ek nazar dekh lo barae-KHuda

tumhaari aankhon pe baiThe hain zahr khae hue

hamein satao na lillah ukhDi baaton se

hum aap gardish-e-gardun ke hain satae hue

'aziz dagh-e-mohabbat hai is qadar mujh ko

fana ke ba'd bhi chhati se hun lagae hue

fana ke ba'd bhi gardish hai 'meri qismat mein

liye phiregi hawa KHak ko uDae hue

paDe hain TuTe hue har qadam pe shisha-e-dil

sanbhal ke rah chalo paon ko bachae hue

sawal-e-wasl jo karta hun to wo kahte hain

mujhi pe baiThe hain kya aap zahr khae hue

kamar pe yar ki hathon ka bojh kya Dalun

wo aap gesuon ke bar hain uThae hue

kafan mein yar ki taswir rakh den dafn ke waqt

lahad se uTThunga us ko gale lagae hue

chala hun sone ko pahlu-e-qabr mein 'kaamil'

jigar pe tegh-e-mohabbat ka zaKHm khae hue