maqam-e-fikr-o-nazar hai buland-binon ko

maqām-e-fikr-o-nazar hai buland-bīnoñ ko

zamīñ ne chiir diyā hai falak ke sīnoñ ko

mirī zamīñ ke sitāroñ se aa rahā hai hijāb

bulandiyoñ pe chamakte hue nagīnoñ ko

mujhe fareb-e-asar de na ab ġham-e-hastī

bahut 'azīz maiñ rakhtā huuñ ābgīnoñ ko

hamīñ ne shorish-e-tūfāñ meñ nā-ḳhudā.ī kī

hamīñ ne paar lagāyā hai in safīnoñ ko

mirī jabīñ se hī Tapke hue ye motī haiñ

zamīñ kī kokh ne uglā hai jin ḳhazīnoñ ko

nahīñ rumūz-e-ḳhudī se vo āshnā 'muztar'

har ek dar pe jhukāte haiñ jo jabīnoñ ko

maqam-e-fikr-o-nazar hai buland-binon ko

zamin ne chir diya hai falak ke sinon ko

meri zamin ke sitaron se aa raha hai hijab

bulandiyon pe chamakte hue naginon ko

mujhe fareb-e-asar de na ab gham-e-hasti

bahut 'aziz main rakhta hun aabginon ko

hamin ne shorish-e-tufan mein na-KHudai ki

hamin ne par lagaya hai in safinon ko

meri jabin se hi Tapke hue ye moti hain

zamin ki kokh ne ugla hai jin KHazinon ko

nahin rumuz-e-KHudi se wo aashna 'muztar'

har ek dar pe jhukate hain jo jabinon ko