qatre ko aap dariya ka rutba na dijiye

qatre ko aap dariyā kā rutba na dījiye

zarre ko āftāb kā darja na dījiye

ḳhushiyoñ kī maiñ talāsh meñ aayā huuñ gaañv se

pardes meñ ġharīb ko dhokā na dījiye

aisā na ho ki bad-du'ā nikle zabān se

maañ ko ye sūkhī roTī kā TukḌā na dījiye

ham tum se duur ho gaye dil TūTne ke baa'd

paiġhām dostī kā dubāra na dījiye

sab dekhtā hai vo jise ham dekhte nahīñ

jhūTā kabhī kisī ko bharosa na dījiye

dil TuuT jā.egā to milegā na phir 'hasan'

tark-e-ta'alluqāt kā mauqa' na dījiye

qatre ko aap dariya ka rutba na dijiye

zarre ko aaftab ka darja na dijiye

KHushiyon ki main talash mein aaya hun ganw se

pardes mein gharib ko dhoka na dijiye

aisa na ho ki bad-du'a nikle zaban se

man ko ye sukhi roTi ka TukDa na dijiye

hum tum se dur ho gaye dil TuTne ke ba'd

paigham dosti ka dubara na dijiye

sab dekhta hai wo jise hum dekhte nahin

jhuTa kabhi kisi ko bharosa na dijiye

dil TuT jaega to milega na phir 'hasan'

tark-e-ta'alluqat ka mauqa' na dijiye