kisi ke labon ki dua chahta hai

kisī ke laboñ kī du'ā chāhtā hai

bhalā dard-e-dil aur kyā chāhtā hai

sitam kā mohabbat sila chāhtā hai

ki ab be-vafā bhī vafā chāhtā hai

dikhā husn phir se uThā phir se pardā

koī zindagī kī davā chāhtā hai

uThā de nigāheñ mirī samt ik baar

samundar meñ dil Dūbnā chāhtā hai

mirī jaan majbūr huuñ maiñ vagarna

mujhe bhī koī dūsrā chāhtā hai

mire hāl-e-dil se ḳhabar-dār hai vo

zabāñ se magar tazkira chāhtā hai

javānī nahīñ ik balā hai ki har dam

junūñ ik nayā rāsta chāhtā hai

har ik aarzū pesh kar dī hai maiñ ne

vahī hogā ab jo ḳhudā chāhtā hai

kisi ke labon ki du'a chahta hai

bhala dard-e-dil aur kya chahta hai

sitam ka mohabbat sila chahta hai

ki ab be-wafa bhi wafa chahta hai

dikha husn phir se uTha phir se parda

koi zindagi ki dawa chahta hai

uTha de nigahen meri samt ek bar

samundar mein dil Dubna chahta hai

meri jaan majbur hun main wagarna

mujhe bhi koi dusra chahta hai

mere haal-e-dil se KHabar-dar hai wo

zaban se magar tazkira chahta hai

jawani nahin ek bala hai ki har dam

junun ek naya rasta chahta hai

har ek aarzu pesh kar di hai main ne

wahi hoga ab jo KHuda chahta hai