dil se har naqsh-e-mohabbat ko miTa deta hun

dil se har naqsh-e-mohabbat ko miTā detā huuñ

maiñ kahāñ lauT ke aane kī sadā detā huuñ

aur to kuchh bhī nahīñ tere tasavvur ke sivā

jis ke aate hī maiñ har ġham ko bhulā detā huuñ

ek vo vaqt ki har yaad sañbhālī terī

ab tirā ḳhat ho nishānī ho jalā detā huuñ

mālik-e-arz-o-samā tere huzūr aayā huuñ

dil meñ maujūd har ik but ko girā detā huuñ

mujh ko mā'lūm tirā milnā muqaddar meñ nahīñ

bas isī jurm pe is dil ko sazā detā huuñ

dil ko ik 'umr huī sang banā.e lekin

yād-e-māzī meñ kabhī aañsū bahā detā huuñ

itnī nādān tabī'at hai ki dil meñ jo kabhī

sham' ummīd kī jaltī hai bujhā detā huuñ

apnī shorīda-mizājī kā ye 'ālam hai ki ab

ḳhud se rūThūñ to maiñ ḳhud ko bhī bhulā detā huuñ

dil se har naqsh-e-mohabbat ko miTa deta hun

main kahan lauT ke aane ki sada deta hun

aur to kuchh bhi nahin tere tasawwur ke siwa

jis ke aate hi main har gham ko bhula deta hun

ek wo waqt ki har yaad sanbhaali teri

ab tera KHat ho nishani ho jala deta hun

malik-e-arz-o-sama tere huzur aaya hun

dil mein maujud har ek but ko gira deta hun

mujh ko ma'lum tera milna muqaddar mein nahin

bas isi jurm pe is dil ko saza deta hun

dil ko ek 'umr hui sang banae lekin

yaad-e-mazi mein kabhi aansu baha deta hun

itni nadan tabi'at hai ki dil mein jo kabhi

sham' ummid ki jalti hai bujha deta hun

apni shorida-mizaji ka ye 'alam hai ki ab

KHud se ruThun to main KHud ko bhi bhula deta hun