chehra talashta hun main jis mehrban ka

chehra talāshtā huuñ maiñ jis mehrbān kā

dushman banā huā hai vahī merī jaan kā

dīpak bhī ban na paayā vo mere makān kā

sūraj samajh rahā thā jise āsmān kā

maiñ 'ishq 'ishq paḌhtā rahā ashk ashk ko

ik mubtadī huuñ maiñ abhī urdu zabān kā

vo sun rahā hai merī ḳhamoshī ko ġhaur se

ye vaqt hai dar-asl mire imtihān kā

ghar ko usī ne nīst-o-nābūd kar diyā

hissa jise samajhtā thā apne makān kā

ham ne banā liyā hai jise apnā rāzdār

sochā nahīñ thā niklegā kachchā vo kaan kā

kāñTā samajh ke mujh se na dāman bachā.iye

maiñ bhī kabhī thā phuul kisī phūl-dān kā

ye aur baat hai ki zamīñ par na chal sake

ham hausla to rakhte haiñ dil meñ uḌaan kā

kal tak jo mere TukḌoñ pe paltā rahā 'kabīr'

shajra vo pūchhtā hai mire ḳhāndān kā

chehra talashta hun main jis mehrban ka

dushman bana hua hai wahi meri jaan ka

dipak bhi ban na paya wo mere makan ka

suraj samajh raha tha jise aasman ka

main 'ishq 'ishq paDhta raha ashk ashk ko

ek mubtadi hun main abhi urdu zaban ka

wo sun raha hai meri KHamoshi ko ghaur se

ye waqt hai dar-asl mere imtihan ka

ghar ko usi ne nist-o-nabud kar diya

hissa jise samajhta tha apne makan ka

hum ne bana liya hai jise apna raazdar

socha nahin tha niklega kachcha wo kan ka

kanTa samajh ke mujh se na daman bachaiye

main bhi kabhi tha phul kisi phul-dan ka

ye aur baat hai ki zamin par na chal sake

hum hausla to rakhte hain dil mein uDan ka

kal tak jo mere TukDon pe palta raha 'kabir'

shajra wo puchhta hai mere KHandan ka