chaman mein hum akele aur hasad sare zamane mein

chaman meñ ham akele aur hasad saare zamāne meñ

kabhī sukh se na baiThe do ghaḌī bhī āshiyāne meñ

jinheñ ham chārasāz-e-zaḳhm-e-dil apnā samajhte haiñ

namak-pāshī vahī karte haiñ aksar muskurāne meñ

charāġh ik jal uThā duniyā mohabbat kī chamak uTThī

mire dāġh-e-jigar se ho ga.ī raunaq zamāne meñ

kabhī bijlī chamaktī hai kabhī kauñdā lapaktā hai

ḳhudā mā'lūm kyā rakkhā hai mere āshiyāne meñ

mirā sarmāya-e-hastī kitāb-e-dars-e-ulfat hai

zamāne ke bhare haiñ dard-o-ġham mere fasāne meñ

lalak kyā chiiz hai par jal chuke ab tan kī baarī hai

magar masrūf hai parvāna himmat āzmāne meñ

'munīr' un husn vāloñ kī saḳhāvat āzmāne ko

liye kashkol-e-dil phirtā rahā saare zamāne meñ

chaman mein hum akele aur hasad sare zamane mein

kabhi sukh se na baiThe do ghaDi bhi aashiyane mein

jinhen hum chaarasaz-e-zaKHm-e-dil apna samajhte hain

namak-pashi wahi karte hain aksar muskurane mein

charagh ek jal uTha duniya mohabbat ki chamak uTThi

mere dagh-e-jigar se ho gai raunaq zamane mein

kabhi bijli chamakti hai kabhi kaunda lapakta hai

KHuda ma'lum kya rakkha hai mere aashiyane mein

mera sarmaya-e-hasti kitab-e-dars-e-ulfat hai

zamane ke bhare hain dard-o-gham mere fasane mein

lalak kya chiz hai par jal chuke ab tan ki bari hai

magar masruf hai parwana himmat aazmane mein

'munir' un husn walon ki saKHawat aazmane ko

liye kashkol-e-dil phirta raha sare zamane mein